Thursday 7 June 2018



கண்களை அள்ளும் கடல்பகுதி
பவழப்பாறைகள்.. பலவண்ண மீன்கள்
உள்ளம் அள்ளும் ஆவணப்படம்

இன்று உலக கடல்கள் நாள்….

கடல் என்றாலே கொள்ளை அழகுதான். அந்தக் கடல்களில் மிக அழகானவை பவழப்பாறைகள் நிறைந்த பார்க்கடல்கள். உலகின் மிகப்பெரிய பார்க்கடல் ஆஸ்திரேலியாவின் கிரேட் பேரியர் (Great Barrier) பார்க்கடல்தான்.
விண்வெளியில் இருந்து பார்த்தால், பூமியில் தெரியும் உயிருள்ள ஒரே பொருள் இதுதான். இந்த விந்தையான கிரேட் பேரியர் (Great Barrier) பார்க்கடலைப் பற்றி டேவிட் அட்டன்பரோ என்பவர் அழகான ஆவணப் படத்தை எடுத்திருக்கிறார்.

சிறிய ரக நவீன நீர்மூழ்கிக் கப்பல்கள், சூப்பர் ஹைடெக் காமிராக்கள், மேக்ரோ லென்ஸ்கள், செயற்கைக் கோள் ஸ்கேனர்களின் உதவியுடன் வளைத்த வளைத்து இந்த ஆவணப் படத்தைத் தயாரித்திருக்கிறார் டேவிட் அட்டன்பரோ. இதன் மூலம் அவரது 60 ஆண்டுகால கனவு நனவாகி யிருக்கிறது.
பச்சை ஆமை, பல வண்ண மீன்கள், சுறாக்கள், கடல்பாம்பு, யானைத்திருக்கை எனப்படும் மிகப்பெரிய மண்டா (Manta) திருக்கை, திமிங்கிலம் என பலவகை கடல் உயிரினங்கள் இந்த ஆவணப்படத்தில் தோன்றி அசத்தியிருக்கின்றன.
கிரேட் பேரியரில் உள்ள ரிப்பன், ஆஸ்பிரே, லேடி எலியட், மேக்னெடிக் ஆர்பியஸ், லிஸார், ஹெரான் தீவுகள் மாயஜாலம் போல மனதை மயக்கக் கூடியவை. 
2 ஆயிரத்து 500 கடலடிப் பாறைகளும், ஆயிரத்து 50 தீவுகளும் கொண்ட கிரேட் பேரியர் பவழப்பாறைகளைக் காண ஆண்டுக்கு 20 லட்சம் சுற்றுலாப்பயணிகள் ஆஸ்திரேலியாவுக்கு வருகை தருகிறார்களாம்.