துள்ளல்மீன் பறளா

பறளா எனப்படும் அய்லஸ்

 பறளா (Mahi Mahi) என்ற மீனைப்பற்றி நமது வலைப்பூவில் ஏற்கெனவே பதிவிட்டுள்ளோம். அதனால் என்ன? அதே மீனைப் பற்றி புதிய சில தகவல்களுடன் பதிவிட்டால் ஒன்றும் குறைந்து போய்விடாது. எனவே இந்த புதிய பதிவு.

கடலில் மிகமிக வேகமாக வளரும் மீன்களில் ஒன்று பறளா. பசிபிக், அட்லாண்டிக், இந்தியப் பெருங்கடல் பகுதிகளில், கடல் அடிப்பகுதியை நாடாமல், கடல் மேற் பரப்பையொட்டி வாழும் ஒருமீன் பறளா. சூரை, கொப்பரன் போன்ற உயர்வேக மீன்கள் திரியும் கடலில் அவற்றுக்கு இணையான வேகம் கொண்ட வலிமையான மீன் இது.

கடலில் வரிசையாக மீன்பிடி படகுகள் சென்று கொண்டிருந்தால் அவற்றுக்குப் போட்டியாக நீந்தி அதிவேகத்தில் சிலபல மீன்பிடி படகுகளைக் கடந்து அவற்றை முந்திச் செல்லக்கூடிய மீன் இது. அலைகளைக் கடந்து மிகவேகமாக தங்க நிற துப்பாக்கிக் குண்டைப் போல நீந்திச் செல்லக்கூடியது.

பறளா மீன், பச்சை, மஞ்சள், நீலம் இவற்றுடன் தகதகக்கும் தங்க நிறமும் கொண்டு ஜொலிக்கும் மீன். இதனால்தான் ஸ்பெயின் நாட்டவர்கள் அவர்களது ஸ்பானிய மொழியில் இந்த மீனுக்கு டொராடோ (Dorado) என்று பெயர் சூட்டியிருக்கிறார்கள். டொராடோ என்றால் தங்கம்.

தங்க நிறம்... உடல் செம்பவளம்...

சிலவகை மீன்களுக்குப் பல பெயர்கள் இருக்கும். பறளாவும் அந்த வரிசையில் இடம்பெறத்தக்கது. தமிழில் இது பறளா, அய்லஸ், அப்பிராஞ்சு என்றெல்லாம் அழைக்கப்படுகிறது. வரையோடு என்ற பெயரும் இந்த மீனுக்கு இருப்பதாகக் கேள்விப்பட்டிருக்கிறேன். மலையாளத்தில் இதை புள்ளி மோத்தா என்று அழைப்பார்களாம்.

மத்தியத்தரைக்கடல் நாடான மால்டாவில் இந்த மீன் லம்புகா என்று அழைக்கப்படுகிறது. பசிபிக் கடலில் உள்ள ஹவாய்த் தீவுப் பகுதியில் பேசப்படும் பாலினீசிய மொழியில் இதன் பெயர் மாகி மாகி (Mahi Mahi). மிகுந்த பலம் அல்லது ‘வலிமை.. வலிமை’ என்பது இதற்கு அர்த்தம். நீச்சலில் மட்டுமல்ல, கடலைவிட்டு நீங்கி துள்ளிப்பாய்வதிலும் இந்த மீன் பெயர் பெற்றது. சிலவேளைகளில் அதிக உயரம் துள்ளி படகுகளிலும் இது வந்து விழுந்து தானாக சிக்கிக் கொள்ளும். இப்படி ஓங்கி உயரக் குதிப்பதால் ஆங்கிலத்தில் இந்த மீனுக்கு ‘டால்பின் மீன்’ என பெயர் சூட்டி விட்டார்கள். மற்றபடி, டால்பின் எனப்படும் ஓங்கலுக்கும், இந்த மீனுக்கும் எந்தத் தொடர்பும் இல்லை. ஓங்கல் பாலூட்டி இனம். பறளா மீன் இனம்.

அய்லஸ் எனப்படும் பறளா மீன், 7 கிலோ முதல் 15 கிலோ வரை எடையிருக்கக் கூடியது. சில மீன்கள் 39 கிலோ வரையிலும் கூட எடையிருக்க வாய்ப்புள்ளது.  பறளாக்களில், ஆண் மீனை விட பெண் மீன் சிறியது. பெண் மீனின் தலை வட்ட வடிவமானது. மொண்ணையாக, மழுங்கிப்போனது மாதிரியான முகமும், நீண்ட தூவியும் (Fin) பறளாவின் முதன்மையான அடையாளம்.

கடல் மேற்பரப்பு மீனான பறளா, கடலில் மிதக்கும் பாசிகள், தென்னை ஓலைகள், மரத்துண்டுகள் இடையே சுற்றித் திரிவதை விரும்பும். பார் ஓரங்களிலும் இது காணப்படும். கோலா, சாளை, கணவாய், நண்டு இவற்றுடன் கவர் எனப்படும் பிளாங்டன் மிதவை நுண்ணுயிர்களையும் பறளா உண்ணும்.

கண்கவர் மீன்

கடலில் சூரை, கொப்பரான் திரியும் இடத்தில் திரியும் பழக்கம் கொண்ட பறளா, சூரையைப் போல வெளிச்சம் குறைவான நேரத்தில் மட்டும் இரையைக் கடிக்காமல், நல்ல பகல் பொழுதில் கூட சுறுசுறுப்பாக இயங்கி இரை தேடக்கூடியது. வேகமாக ஓடும் இரையை இது மிகவும் விரும்பிப் பிடிக்கும்.

பறளாவைத் தூண்டிலில் பிடிக்க, முதலில் ஒரு மீன் துண்டை அதற்கு இரையாக கடலில் போட்டு அதை கவர்ந்து இழுப்பார்கள். பின்னர் அதே இரையை தூண்டிலில் கொளுவி பறளாவைப் பிடிப்பார்கள். சாளை போன்ற உயிருள்ள மீன்களை இரையாக வைத்தால் பறளா எளிதாகத் தூண்டிலில் சிக்கும். உண்ணத்தகுந்த சுவையான மீன் பறளா.

பறளா ஏழு ஆண்டுகாலம் வரை உயிர்வாழக்கூடியது. பச்சை, மஞ்சள், நீலம், பொன்னிறம் என பல வண்ணங்களில் பொலியும் பறளா மீன் பிடிபட்டு இறந்துவுடன் உடல் வண்ணங்கள் இருண்டு போய் அதன் அழகிய நிறம் கறுத்துப் போய்விடும்.

#பறளா பற்றிய நமது வலைப்பூ பழைய பதிவு: 2014 பிப்ரவரி