பன்மீன் கூட்டம் (தொடர்ச்சி)

1216. முஞ்சோள், 1217. குறிமீனில் வத்தைக்காய் குறிமீன், 1218. வாளையில் நெடுவாளை, 1219. மெய்வாளை, 1220.முரலில் கறிமுரல், 1221. வல்லா  முரல், 1222, பேளையில் கண்ணம்பேளை, 1223. வரிப்பேளை, 1224. தேடு இனத்தில் (கெழுதில் பெரியது) கருந்தேடு, 1225. பீத்தேடு,

1226. மூச்சாவில் அழுவை மூச்சா, 1227. கல் மூச்சா, 1228. சக்காணி மூச்சா, 1229. வள (வலை) மூச்சா, 1230. கிளாத்தியில் கொம்பன் கிளாத்தி, 1231. மணங்கில் சப்பை மணங்கு, 1232. கடிமணங்கு, 1233. களவாவில் புலிக்களவா, 1234. நாக்கண்டத்தில் சோணா நாக்கண்டம், 1235. காரலில் கொளுவக் காரல், 1236 கொழுவக் குட்டிக்காரல், 1237. கொச்சம்பறக் காரல், 1238. சக்காணிக்காரல், 1239. தோவாரக் காரல், 1240. திரியாவில் நெட்டைத் திரியா, 1241. வங்கடைத் திரியா, 1242. சாளைத் திரியா, 1243. கட்டைத் திரியா, 1244. கேரையில் மஞ்சள் கேரை, 1245. வாலாங் கேரை, 1246. பாரையில் கண்ணாம்பாரை, 1247. காவப்பாரை, 1248. மொட்டைத்தலை பாரை(க்குட்டி), 1249. சரபாரை(க்குட்டி), 1250. மத்தியில் கழுதை மத்தி, 1251. கொசு மத்தி, 1252, புளியோடு, 1253. பூட்டளை, 1254.  நரவை, 1255. நாலியாளை, 1256. நந்த மீன்,  (தொடரும்).

வஞ்சிரமும் சீலாவும்

வஞ்சிரம்

வஞ்சிரம் மீனை சிலர் சீலா மீன் எனக் குறிப்பிடுவதைப் பற்றி முந்தைய பதிவில் பார்த்தோம். அடிப்படையில் இவை இரண்டும் வெவ்வேறு இன மீன்கள். வஞ்சிரத்துக்கும், சீலாவுக்கும் இடையில் பல வேறுபாடுகள் உள்ளன.

சீலாவின் பற்கள் மிகக் கூர்மையானவை. கத்தி

போல வளைந்த எதிர்புதிர் கூர்பற்கள் சீலாவுக்கு உண்டு. வஞ்சிரத்துக்கு சிறிய முக்கோண வடிவ பற்கள் மட்டுமே உண்டு.

சீலாவுக்கு கூரான தாடை உண்டு. அதிலும் சீலாவின் கீழ்த்தாடை மேல்தாடையை விட சற்று முன்னோக்கித் துருத்திக் கொண்டிருக்கும். ஆனால் வஞ்சிரத்துக்கு அதுபோன்ற முன்துருத்திய தாடை இல்லை.

சீலாவின் உடலில் மடவை (Mullet) மீனுக்கு இருப்பதைப் போல செதிள்கள் காணப்படும். வஞ்சிரத்துக்கோ நம் பார்வையில் படும்படி செதிள்கள் இருக்காது. வெறும் தோல் கொண்ட மீன் போலவே வஞ்சிரம் தோன்றும்.

வஞ்சிரத்தின் வால் பெரியது. கவடு போல பிளந்தது. வஞ்சிரத்துடன் ஒப்பிடும்போது சீலாவின் வால் சிறியது.

சீலாவுக்குப் பெரிய கண்கள். வஞ்சிரத்துக்கோ சிறிய கண்கள்.

சீலா மிகப்பெரிய வேட்டையாடி மீன். வஞ்சிரமும் கூட ஒரு  கொன்றுண்ணி மீன்தான் என்றாலும் சீலா அளவுக்கு வஞ்சிரம் பெரிய வேட்டையாடி மீன் அல்ல.

இன்னும் கூறப்போனால் சீலா மீன், வஞ்சிரத்தின் இயற்கையான எதிரியும் கூட. கடலில் வஞ்சிரத்தைக் கண்டால் சீலா அதை விரட்டி வேட்டையாடி உணவாக்கிக் கொள்ளும்.

சீலா

கடலுயிர் அருங்காட்சியகம் ஒன்றில், ஓர் ஆய்வு நடவடிக்கைக்காக சீலாவையும்,   வஞ்சிரத்தையும் ஒரே தொட்டியில் விட்டார்கள். இவை இரண்டுக்கும் இடையில் கண்ணுக்குத் தெரியாத மெல்லிய கண்ணாடித் தடுப்பை ஏற்படுத்தினார்கள்.

நடுவில் தடுப்பு இருப்பது தெரியாமல் ஒவ்வொருமுறையும் வஞ்சிரத்தைப் பிடிக்க முயன்று சீலா, கண்ணாடிச் சுவரில் மோதிக் கொண்டது. ஒவ்வொரு முறையும் அதன் தாடை கண்ணாடியில் மோதி மோதி வலியை ஏற்படுத்தியது.

ஒரு கட்டத்தில் வஞ்சிரத்தை நோக்கிப் பாய்ந்து கண்ணாடிச்சுவரில் முட்டிக் கொள்வதை சீலா நிறுத்திக் கொண்டது.

அதன்பின் இந்த இருமீன்களுக்கும் இடையில் இருந்த கண்ணாடிச்சுவர் விலக்கிக் கொள்ளப்பட்டது. என்ன வியப்பு? சீலா அதன்பிறகும் கூட வஞ்சிரம் மீனைக் கொல்லத் துணியவில்லை. இரு மீன்களும் நீண்டகாலம் அந்த தொட்டியில் அமைதியாக வாழ்ந்தன.

வஞ்சிரம் (Narrow barred Spanish Mackerel)

வஞ்சிரம்

தமிழ் கூறும் நல்லுலகில் வஞ்சிரம் என்ற மீனின் பெயரைத் தெரியாதவர்களே இருக்க முடியாது. கடல்மீன்களில் புகழ்பூத்த தாரகையாக மிகவும் மெச்சிப் போற்றப்படும் மீன் இது. கடல்மீன்களில் மிக விலையுயர்ந்த சுவை நிறைந்த மீன்களில் வஞ்சிரமும் ஒன்று                

அயலையைப் போல வஞ்சிரமும் மேக்கரல் வகையைச் சேர்ந்த மீன்தான்.

இந்தியன் மேக்கரல் என அயலை மீன் அழைக்கப்படுவது போல ‘ஸ்பானிஷ் மேக்கரல்‘ என்ற பெயரால் வஞ்சிரம் அழைக்கப்படுகிறது.

‘ஸ்பானிஷ் மேக்கரல்’ மீன்களில் அட்லாண்டிக் ஸ்பானிஷ் மேக்கரல் உள்பட பல்வகை வஞ்சிரம் மீன்கள் இருக்கும்நிலையில், இந்திய, பசிபிக் பெருங்கடல்களில் குறுகிய பட்டைகள் கொண்ட ஸ்பானிஷ் மேக்கரல் மீனினம் ஒன்று வாழ்கிறது.. ஆங்கிலத்தில் இதை Narrow barred Spanish Mackerel என்று அழைக்கிறார்கள். அதை நாம் இங்கே வஞ்சிரம் என்று அழைக்கிறோம்.

வஞ்சிரத்துக்கு அறுக்குளா, மாவுலாசி போன்ற பெயர்களும் உள்ளன. கேரளத்தின் தென்பகுதியில் இதன் பெயர் நெய்மீன். கேரள வடபகுதியில் இதன் பெயர் அயக்கூரா.

தமிழில் வஞ்சிரம் என்ற இந்த மீனின் பெயர் நெடும்பஞ்சூரன், வஞ்சூரன் என்று பெயர்களில் இருந்து மருவி வந்திருக்கலாம் என்று ஒரு கணிப்பு உண்டு. வஞ்சூரன் என்ற பெயர் இது சூரை குடும்பத்து மீன் என்பதைச் சரியாகச் சுட்டிக்காட்டுகிறது.

சிலர் வஞ்சிரமும் சீலா மீனும் ஒன்றுதான் என்று கூறுவார்கள். இப்படி கூறுவது முழுக்க தவறானதுமல்ல. முற்ற முழுக்க சரியானதும் அல்ல.

சீலா என்பது ஆங்கிலத்தில் பாரகுடா (Barracuda) என அழைக்கப்படும் மீன் இனம். (நம் வலைப்பூவில் சீலா பற்றிய பதிவு உண்டு)

வஞ்சிரமோ நாம் ஏற்கெனவே குறிப்பிட்டதுபோல மேக்கரல் வகையைச் சேர்ந்த, ஸ்கோம்பிரிடே (Scombridae) குடும்பத்து மீன்.

ஆனால், நமது தமிழகக் கடல்களில் சுற்றித்திரியும் வஞ்சிரத்துக்கு (Narrow barred Spanish Mackerel)

நெட்டையன் சீலா என்று ஒரு பெயரும் உண்டு. ஆகவே, வஞ்சிரத்தை சீலா என சிலர் அழைப்பது முழுக்க தவறாகாது.

நெட்டையன் சீலா என அழைக்கப்படும் நமது வஞ்சிரம் 38 முதல் 70 கிலோ வரை எடையிருக்கக் கூடியது. 200 செ.மீ. நீளத்துக்கு, அதாவது ஆறடி நீளத்துக்கும் மேல் வளரக் கூடியது. ஆண் மீனை விட பெண் மீன் பெரிதாக இருக்கும்.

விரட்டி வேட்டை...

சீலாவைப் போலவே வஞ்சிரமும் வெள்ளிநிறம் தோய்ந்த உடலைக் கொண்டது. வஞ்சிரத்தின் உடல் மங்கலான நீலம் கலந்த அடர்பழுப்பு நிறமாகத் தோன்றும். அடிவயிற்றை நோக்கி வரும்போது நிறம் வெளிறும். மீனின் இருபக்க அடிப்புறங்களிலும் பட்டையான செங்குத்து கோடுகள் காணப்படும். வஞ்சிரத்தின் வால் சற்றுப் பெரிதாக கவடு போலப் பிளந்திருக்கும்.

வஞ்சிரம் மீன், கண்டச்சுவர்களின் அருகிலும், மிதமான பார்ச்சரிவுப்பகுதிகளிலும் காணப்படும். உப்புத்தன்மை குறைந்த கலங்கலான கடல்பகுதிகளில் இது விரும்பி வாழும்.

நெத்தலி போன்ற மீன்களே வஞ்சிரத்தின் முதன்மை உணவு. மீன்களுடன் ஒப்பிடும் போது குறைவான அளவில் இறால், கணவாய்களையும் இது உணவாகக் கொள்ளும். வஞ்சிரத்தின் முதன்மை எதிரி சீலா மீன்தான்.

ஸ்கோம்பிரோமோரஸ் காமர்சன் (Scomberomorous Commerson) என்பது வஞ்சிரத்தின் (Narrow barred Spanish Mackerel) அறிவியல் பெயர்.

ஆங்கிலத்தில் Seer Fish, King Fish எனவும் வஞ்சிரம் பெருமையுடன் அழைக்கப்படுகிறது.