குமரிச்சுறா (zebra Shark)

குமரிச் சுறா

கடலடியில் கம்பளம் விரித்ததுபோல, அழகிய வண்ணம் மற்றும் வனப்புடன் கூடிய தரை விரிப் பைப் போல சில சுறாக்கள் காட்சி தரும். கடலடியில் அதிகம் நகராமல் தரையோடு தரையாய் படுத் திருக்கும் அந்த சுறாக்களை கம்பளச் சுறாக்கள் (Carpet Sharks) என்று அழைப்பார்கள். குமரிச்சுறாவும் ஒரு வகை கம்பளச் சுறாவே.

சுறாக்கள் பொதுவாக நீந்திக் கொண்டே இருந்தால் தான் உயிர்வாழ முடியும். எப்போதும் இயங்கிக் கொண்டே இருந்தால்தான் செவுள் துளைகள் வழியாக கடல்நீரை உட்கொண்டு அதில் உள்ள காற்றைச் சேகரித்து மூச்சுவாங்கி சுறாக்கள் உயிர்வாழ முடியும்.

ஆனால் குமரிச்சுறா போன்ற கம்பளச் சுறாக்கள் இதற்கு விதிவிலக்கு. கடலடியில் தரையோடு தரையாக படுத்திருந்தாலும்கூட இந்த வகை சுறாக்களால் செவுள் துளைகள் மூலம் மூச்சுவிட முடியும்.

குமரிச்சுறா, இந்தியப்பெருங்கடல் போன்ற வெப்பக் கடல்களில் வாழும் சிறிய சுறா. Stegostoma fesciatum என்பது இந்த சுறாவின் அறிவியல் பெயர். குமராசி எனவும் இது அழைக்கப்படுகிறது.

கடலடியில் 62 மீட்டர் (200 அடி) ஆழத்தில் பவழப்பாறைகள், மணல்வெளிகளில் குமரிச்சுறா காணப்படும்.

குமரிச்சுறா குட்டியாக இருக்கும் போது கரும்பழுப்பு நிறத்தில் மஞ்சள் கலந்த வெள்ளை வரிகளுடன் காணப்படும். இந்த சுறா இனத்துக்கு ஆங்கிலத்தில் சீப்ரா (வரிக்குதிரை) சுறா (zebra Shark) என பெயர் வர இதுவே காரணம்.

குட்டியின் உடலில் வரிகள்

குமரிச்சுறா வளர்ந்தபின் கரும்பழுப்பு, அடர் சாம்பல் நிறமாக மாறும். அப்போது உடலில் சிறுத்தைப் புலிக்கு இருப்பதைப் போல அடர்நிறத்தில் புள்ளிகள் தோன்றும்.

குமரிச்சுறா ஆறடி முதல் 11 அடிவரை வளரக் கூடியது  20 முதல் 30 கிலோ எடைகொண்டது.

பெரிய தலையும், சிறிய கண்களும், ஐந்து செவுள் கீறல்களும் கொண்ட குமரிச்சுறாவுக்கு சிறிய மீசை போன்ற உணர்வு இழைகளும் உண்டு. பவழப்பாறைகளின் இண்டு இடுக்குகளில் இரை தேட இந்த உணர்விழைகள் பயன்படுகின்றன.

குமரிச்சுறாவின் உடல் நெளிவு சுழிவானது. பாறை இடுக்குகளில் இதன் உடல் எளிதாக நுழைந்து செல்லும். குமரிச்சுறாவின் வால் அதன் உடல்அளவுக்கு நீளமானது.  இந்த நீளவால்

இரை மீனை விரட்டி வேட்டையாடவும், விரைவாக நீந்தவும் பயன்படுகிறது. அதுபோல பாறை களுக்குள் நுழைந்து நீந்தும்போது பின்னால் திரும்பிவரவும் இதன் வால் பயன்படும்.

பவழப் பாறைகளில் வாழும் கடல்பாம்புகளை குமரிச் சுறா அதிக அளவில் வேட்டையாடும்.. சிறுமீன்கள், நண்டு, சிப்பிகளும் இதன் இரைப்பட்டியலில் இடம்பெறுகின்றன. குமரிச்சுறாவின் தாடையும், பற்களும் சிப்பிகளை உடைத்துத் தின்ன உதவுகின்றன. குமரிச்சுறாவின் மேல் தாடையில் 28 முதல் 33 பற்களும், கீழ்த்தாடையில் 22 முதல் 34 பற்களும் காணப்படும். குமரிச் சுறாவின் முதன்மை எதிரி வரிப்புலியன் சுறா. இதர சில சுறா இனங்களும் குமரிச் சுறாவை வேட்டையாடும். சுறாக்களைத் தவிர்த்து வேறு இயற்கையான எதிரிகள் யாரும் குமரிச் சுறாவுக்கு இல்லை.

வால் மிக நீளம்...

பகல் வேளைகளில் குமரிச்சுறா பார்வெளிகளில் படுத்திருக்கும். இரவில்தான் இவை இரை தேடித் திரியும். உடலுறவின் போது ஆண் சுறா, பெண் சுறாவின் கன்னத்தூவி, வால் போன்றவற்றை ஆர்வ மிகுதியால் கடிக்கும்.

குமரிச்சுறா மனிதர்களுக்கு ஆபத்தற்ற சுறா. சீண்டினால் மட்டுமே இது கடிக்கும். இதன் கடி அதிக ஆபத்தற்றது. ஒருமுறை சீண்டப்படாமல் கூட இது நீர்மூழ்கி வீரர் ஒருவரைக் கடித்த நிகழ்வும் உண்டு.

குமரிச்சுறாக்களில் பெண் சுறாக்கள் முட்டையிட்டு அவற்றை பாறைகளில் கொழுவிவிடக் கூடியவை. முட்டைகள் தானாகப் பொரித்து அதில் இருந்து குஞ்சுகள் வெளிவரும். குமரிச் சுறா 30 ஆண்டுகள் வரை உயிர் வாழக் கூடியது.