கண்டா ஓங்கல் (Risso Dolphin)

ஓங்கல் இனத்தில் சற்று பெரிய உடல்தடித்த ஓங்கல் இது. ஓங்கல்களுக்கே உரித்தான நீண்ட அலகு இல்லாத ஓங்கலும் இதுதான். பந்து வடிவ செங்குத்துத் தலை, கண்டா ஓங்கலின் முதன்மை அடையாளம். அரிவாள் போன்ற சற்று வளைந்த ஆனால் உயர்ந்து நிமிர்ந்த முதுகுத்தூவியையும் இதன் முதன்மை அடையாளமாகக் கொள்ளலாம்.

கண்டா ஓங்கல் 13 அடி நீளம் வரை வளரக்கூடியது. 500 கிலோ வரை நிறையிருக்கக் கூடியது. குட்டியில் சாம்பல் நிறமாகவும், பின்னர் சாக்லெட் பழுப்பு நிறத்துக்கும் மாறும் கண்டா ஓங்கல், முதிர்ந்ததும் வெள்ளி நிறமாக மாறி பின்னர் கறுநிறம் கலந்த பலப்ப பலகையின் (Slate) நிறத்துக்கு மாறும். கண்டா ஓங்கலின் அடிப்பகுதி வெள்ளை நிறம். இதன் பக்கத்தூவிகளும், வாலும் கறுப்பானவை. பக்கத்தூவிகள் நீளமானவை கூடவே கூர்மையானவை.

கண்டா ஓங்கலின் பக்கத்தூவிகளின் கீழ்ப்பகுதி வெண்மை நிறம் என்பதுடன் இந்த வகை ஓங்கலின் கன்னம் தொடங்கி வயிறுவரை நங்கூரக் குறிகள் காணப்படும்.

இதன் கரிய நிற உடல் முழுவதும் ஏராளமாகவும், தாராளமாகவும் வெள்ளை நிற கிறுக்கல் குறிகளைக் காணலாம்.

இதர கண்டா ஓங்கல்களுடன் விளையாடும்போதோ அல்லது சண்டையிடும் போதோ அவற்றின் பல்பட்ட கீறல்களாக இவை இருக்கலாம். அல்லது கண்டா ஓங்கலின் முதன்மை இரைகளான கணவாய்களால் ஏற்பட்ட கடி காயங்களாகக் கூட இந்த வெள்ளைக்கீறல்கள் இருக்கலாம்.

Grampus இனத்தைச் சேர்ந்த ஒரே உறுப்பினர் கண்டா ஓங்கல்தான்.

கண்டா ஓங்கல்களில் ஆணும், பெண்ணும் ஏறத்தாழ ஒரே அளவு உருவமும் வடிவமும் கொண்டவை. எனினும், ஆண் ஓங்கலின் முதுகுத்தூவி சற்று நீளமாகவும், ஆணை விட பெண் ஓங்கல் சற்று பெரியதாகவும் இருக்க வாய்ப்புள்ளது.

வெப்பக்கடல் ஓங்கலான கண்டா ஓங்கலுக்கு கீழ்த்தாடையில் 2 முதல் 7 இணைப்பற்கள் உள்ளன. எதிரிகளான சுறாக்களுடன் சண்டையிட, கணவாயை இரை பிடிக்க இந்த பற்கள் பயன்படுகின்றன.

ஆழ்கடல் ஓங்கலான கண்டா ஓங்கலை கரைப்பகுதியில் காணமுடியாது. 1300 முதல் 3300 அடி ஆழத்தில் இது காணப்படும். ஐந்தே மணித்துளிகளில் முக்குளித்து வெகுவிரைவில் ஆயிரம் அடி ஆழத்துக்கு இரைதேடி இது செல்லக்கூடியது. அங்கு அரைமணிநேரம் வரை இது தங்கியிருக்கக் கூடியது.

கண்டா ஓங்கலின் முதன்மை இரை கணவாய்கள்தான். பீலிக்கணவாய் (Squid), ஓட்டுக் கணவாய், பேய்க்கணவாய் போன்ற அனைத்துக் கணவாய்களையும் கண்டா ஓங்கல் வேட்டையாடும். எனினும், இந்தப் பட்டியலில் பீலிக் கணவாய்க்கே முதலிடம். பீலிக்கணவாய்கள் இரவுப்பொழுதில் இரை தேடி கடல்மட்டம் நோக்கி கிளம்பும்போது அவற்றை கண்டா ஓங்கல் வேட்டையாடும். மீன்கள், நண்டுகளையும் இது உண்ணும்.

கண்டா ஓங்கல் திமிங்கிலம் போல தலைமேலுள்ள துளையால் மூச்சுக் காற்றைப் பீய்ச்சியடிக்க கூடியது. சிறிய குக்கரில் இருந்து கிளம்பும் ஆவி போல ஒன்றரை அடி உயரத்துக்கு காற்றை கண்டா ஓங்கல் பீய்ச்சியடிக்கும்.

ஓங்கல்களுக்கே உரித்தான கழைக்கூத்தாடி வித்தைகளில் கண்டா ஓங்கலும் கைதேர்ந்த்து. கடல்நீரைவிட்டு முழுவதுமாக இது துள்ளிவிழக்கூடியது. வாலை வன்மையாக ஆட்டுவதுடன், சீழ்க்கை உள்பட பல்வேறு ஒலிகளை இது எழுப்ப வல்லது.

கண்டா ஓங்கல் 10 முதல் 12 மாதத்தில் ஒரே ஒரு குட்டியை ஈனக்கூடியது. அலைகளில் சறுக்கி சில்லியெடுக்கும் (Surf) பழக்கம் இதற்கு உண்டு. மற்ற இன ஓங்கல்களைப் போலவே கண்டா ஓங்கலும் இதர ஓங்கல்களுடன் நட்பு பாராட்டும். இனப்பெருக்க காலத்தின்போது மட்டும் தன்னின ஓங்கல்களுடன் இது சிறு சண்டைகளில் ஈடுபடும். 10 முதல் 50 ஓங்கல்கள் கொண்ட கூட்டமாகத் திரியும் கண்டா ஓங்கல்கள் சிலவேளை ஆழப்பெருங்கடல்களில் திருவிழாவுக்குத் திரள்வது போல 4 ஆயிரம் வரை திரள்வதும் உண்டு.

கண்டா ஓங்கலின் ஆயுள் ஏறத்தாழ 20 ஆண்டுகள்.

வலுவாடி (புள்ளித்திருக்கை) (Spotted Eagle Ray)

திருக்கைகளில், ஆனைத் திருக்கைக்கு (Manta ray) அடுத்தபடி பெரிய உருவம் கொண்ட திருக்கை வலுவாடி எனப்படும் புள்ளித்திருக்கைதான். திருக்கைகளில் கண்ணுக்கு மிகவும் இன்பமூட்டும் திருக்கையும் இதுதான். வலுவாடி அதன் வாலையும் 16 அடி நீளம் இருக்கலாம். இதன் பறவை போன்ற சிறகுகளின் அகலம் மட்டும் பத்தடி வரை இருந்தால் வியப்ப தற்கில்லை. 230 கிலோ வரை நிறை கொண்ட பெரிய திருக்கை இது. வலுவாடியின் மேலுடல் பசுமஞ்சள் நிறமாகவோ, கருநீலநிற சாயலாகவோ கூட இருக்கலாம். அதில் வெள்ளைநிற புள்ளிகள் அழகுமிளிர காணப்படும். வலுவாடியின் அடிப்பகுதி வெண்ணிறமானது. திருக்கைகளில் மிக நீளமான வால் கொண்ட திருக்கைகளில் வலுவாடியும் ஒன்று. இதன் கரிய நிற வால், 1.2 மீட்டர் முதல் 2 மீட்டர் நீளத்துடன் திகழும்.இந்த நீள வாலில் 2 முதல் 6 நச்சு முள்கள் காணப்படலாம்.

வலுவாடியின் தாடை வட்டமானது, அலகு பறவை போல கூர்மையானது. இந்த அலகின் மூலம் இரைமீன்களின் வாசனை, மின்னலைகளை வலுவாடியில் உணர்ந்து இரைதேட முடியும்.

உருவில் பெரிதாக இருந்தாலும் வலுவாடி திருக்கைக்கு ஆனைத் திருக்கையைப் போலவே அடக்கமான குணம். தனித்துத் திரியும் பழக்கமும், கூச்சமும் கொண்ட வலுவாடி திருக்கை, மனிதர்களின் அண்மையை வெறுக்காது. கடலில் முக்குளிப்பவர்களிடம் இது நெருங்கி வரக்கூடியது. பொதுவாக ஆபத்தற்றது.
வலுவாடி சுறுசுறுப்பாக எப்போதும் நீந்தக்கூடியது. திருக்கை இனத்தின் மற்ற உறுப்பினர்களைப் போல மணலில் புதையாமல், பெருங்கடல் எங்கும் நீந்தித் திரியும் திருக்கை இது. 

வலுவாடி சுறுசுறுப்பாக எப்போதும் நீந்தக்கூடியது. சிறகுகளை அசைத்து கடலடியில் ஒரு பறவையைப்போல இது பறக்கும் அழகே தனி.

கடலடியில் மற்ற சாட்டை வால் திருக்கைகளைப் போல இது ஓரிடத்தில் தரித்து நிற்காது. நாள் முழுவதும் கடலடி மண்டியைக் கிளறி இது இரை தேடியபடி இருக்கும்.மீன், நண்டு, சிப்பி உள்பட பலவகை இரைகளை வலுவாடி உண்ணக்கூடியது. இதன் வலுவான தாடைகளால் சிப்பி போன்றவற்றை எளிதாக உடைக்க முடியும்.

தனித்து திரியும் பழக்கம் உள்ள வலுவாடி திருக்கை, இனப்பெருக்கக் காலத்தில் பெருந்திரளாகக் கூடும். கடலின் மேல்மட்டத்துக்கு வந்து நீரின் மேல் இரைந்து விழும் பழக்கமும் வலுவாடித் திருக்கைக்கு உண்டு. சிலவேளைகளில் இது கடல்நீர்ப்பரப்பை விட்டு துள்ளி, சற்று ‘பறக்கவும்‘ செய்யும்.

கடலின் 6 முதல் 80 மீட்டர் ஆழத்தில் வலுவாடி காணப்படும். 1 முதல் 4 வரை உயிருள்ள குட்டிகளை பெண்திருக்கை ஈனும். வலுவாடியின் இயற்கையான எதிரி சுறாக்கள்தான்.

சுறாக்களால் வேட்டையாடப்படும் ஆபத்து வலுவாடிக்கு உண்டு.

பார்கள் எனப்படும் பவழப்பாறைகளுடன் தொடர்புள்ள வலுவாடித் திருக்கைக்குத் தொலைகடல்களுக்கு வலசை போகும் பழக்கமும் உண்டு.

அழுங்காமை (Hawks bill turtle)

அழுங்காமைக்கு ஏகப்பட்ட பேர்கள். பருந்தலகு ஆமை, எலிமூஞ்சி ஆமை, ஆமையோட்டு ஆமை (Tortoise shell Turtle)… இப்படிப் பல பெயர்களில் அழுங்காமை அழைக்கப்படுகிறது.

கடலின் அடியாழத்தை கவனமாக தவிர்க்கும் ஆமை இது. பொதுவாக வெப்பக்கடல்களில் பவழப்பார்களை அண்டியே இது வாழும். ஆழக் கடல்களை அழுங்காமை விரும்பாது.

மற்ற கடல்ஆமைகளுடன் ஒப்பிடும்போது அழுங்காமை பெரிய உரு கொண்ட ஆமை அல்ல.

இரண்டரை அடி வரை அழுங்காமை வளரலாம். ஒரு மீட்டர் நீளமான ஆமையும் உண்டு. நிறை 45 முதல் 75 கிலோ.

அழுங்காமையின் பல வண்ண ஓடு மிகமிக அழகானது. விலைமதிப்பற்றது.

இளம் ஆமையின் ஓடு இதய வடிவில் காணப்படும். வளர்ந்தபின் ஓடு நீட்டமாகும். பெண் ஆமையை விட ஆண் ஆமையின் ஓடே மிகவும் வண்ணம் செறிந்து திகழும்.

ஓட்டின் பின்புறத்தில் மெல்லிய பலநிற செதிள்கள் காணப்படும். மாம்பழத்தோல் போல, இதன் ஓட்டின் தோல் உரிந்துவரக் கூடியது.

இதன் கனத்த தடித்த தோடு எதிரிகளிடம் இருந்து அழுங்காமையைக் காப்பாற்றினாலும் சுறா, கணவாய் போன்றவற்றுக்கு அழுங்காமை அவ்வப்போது இரையாகக் கூடியது.

அழுங்காமையின் முதன்மை அடையாளமே அதன் அழகிய பலவண்ண ஓடும், பறவை மூக்கும்தான்.

அழுங்காமைக்கு பறவை மூக்கு போல கூரிய சொண்டு (அலகு) உண்டு. பருந்தலகு ஆமை என்று இது அழைக்கப்பட இதுவே காரணம். கால் துடுப்பு ஒவ்வொன்றிலும் அழுங்காமைக்கு இரண்டிரண்டு நகங்கள் இருக்கும். இதில் ஆண் ஆமைகளின் உகிர்கள் (நகங்கள்) பெண்ணைக் காட்டிலும் சற்று நீளமானவை.

அழுங்காமை ஓர் அனைத்துண்ணி. பார்களைச் சுற்றித்திரியும் இது கடல்பாசி, கடல் சாமந்தி, மூரை, சொறிமீன், சிறிய மீன்களை உணவாக்க கூடியது. ஆயினும், அழுங்காமையின் முதன்மை இரை, பார்களில் காணப்படும் கடற்பஞ்சு உயிரினம்தான்.

குறுகிய மூக்கால் பார்களின் இண்டு இடுக்குகளில் இது கடற்பஞ்சுகள், கடல் நத்தைகளைத் தேடித் தேடி இரையாக்கும். கடற்பஞ்சுகள் நச்சுத் தன்மை உள்ளவை. கண்ணாடி போன்ற முட்கள் கொண்டவை. அழுங்காமை உண்ணும் கடற்பஞ்சுகளின் நஞ்சு அனைத்தும் அழுங்காமையின் உடலில் சேமித்து வைக்கப்படும். இந்த நஞ்சு அழுங்காமையை ஒன்றும் செய்யாது.

ஆனால், அழுங்காமையைத் தின்பவர்களின் கதி அதோகதி.

கட்டைச்சுறா (Black tip reef Shark)

கடலின் மிக மூத்த குடிகள் என்றால் அது சுறாக்கள்தான். ஏறத்தாழ 410 மில்லியன் ஆண்டுகளுக்கு முன்தோன்றிய மூத்தகுடி சுறா. (திமிங்கிலம் தோன்றியது வெறும் 55 மில்லியன் ஆண்டுகளுக்கு முன்புதான்) வாழ்ந்தவர் கோடி மறைந்தவர் கோடி என்பது போல, கடந்த பல மில்லியன் ஆண்டுகளில் ஏராளமான சுறா இனங்கள் தோன்றி அழிந்திருக்கின்றன.

இன்றைய நம் உலகில் 440 முதல் 450க்கும் மேற்பட்ட சுறா இனங்கள் உள்ளன.

சுறாக்களில் ஒருவகை சிறிய சுறா கட்டைச்சுறா அல்லது கட்டசுறா. பார்வைக்கு இது மிகவும் அழகான சுறாவும் கூட. 6 அடி நீளம் கொண்ட கட்டைச்சுறா சிறியது ஆனால் மின்னல்போல வேகம் மிக்கது. இதன் நிறை வெறும் 20 முதல் 25 கிலோதான்.

பவழப்பாறைகள், மணற்பாங்கான ஆழம் குறைந்த கடல்களில் சிறு கூட்டமாக கட்டைச்சுறா சுற்றித்திரியும்.

கடலில் முக்குளிப்பவர்கள் அடிக்கடி காணக்கூடிய சுறா இது. சிறிய சுறா என்பதால் இது ஆபத்தற்ற சுறா. கடல்நீர் கலங்கியிருக்கும் வேளையில் சீண்டியபோது மட்டுமே கட்டைச்சுறா மனிதர்களைத் தாக்கியிருக்கிறது. மற்றபடி இது மனிதர்களின் அண்மையை வெறுத்து, ஒதுங்கிச் செல்லக் கூடிய சுறா.

கட்டைச்சுறாவை பயமுறுத்துவது எளிது. பயப்படும்போது இந்த சுறா S வடிவில் நெளியும்.

கட்டைச்சுறாவின் அனைத்து தூவிகளின் முனைகளிலும் சிறு கறுப்புத்திட்டு காணப்படும். குறிப்பாக முதுகுத்தூவியில் இந்த கறுப்புத்திட்டு ஒரு முக்கோணம் போல அழகுபட துலங்கும். கட்டைச்சுறாவின் முக்கிய அடையாளமே இதுதான்.

உடலின் அளவு மற்றும் மொண்ணையான மூக்கு காரணமாக கட்டைச்சுறா என்ற பெயர் இதற்கு ஆகி வந்திருக்கிறது.

கட்டைச்சுறா ஓரடி ஆழமுள்ள கடற்கரைப்பகுதிக்கு கூட வந்து செல்லும். அப்படி வரும் போது இதன் முதுகுத்தூவி கடல்மட்டத்துக்கு மேல் தெரிந்து பயமுறுத்தும். சின்னஞ்சிறு பார்மீன்களே கட்டைச்சுறாவின் முதன்மை உணவு. இரைமீன்களை வேட்டையாடும்போது தன்னின சுறாவுடன் இணைந்து இது கூட்டாகச் செயல்படும். ஓங்கல்களைப் போலவே மீன்கூட்டத்தை ஒரு பந்தாகத் திரட்டி கட்டைச் சுறாக்கள் விருந்துண்ணும். கணவாய், இறால்களையும் இது தின்னும்.

கடல்நீரை விட்டு முழுவதுமாக வெளியே துள்ளிக்குதிக்கும் ஒருசில சுறாக்களில் கட்டைச்சுறாவும் ஒன்று. இரைமீன்கூட்டத்தை உளவு பார்க்க கட்டைச்சுறா இப்படி கடல்மேல் துள்ளும். இதை ஒற்றன் துள்ளல் (SPY HOPPING) என்பார்கள். கட்டைச்சுறாவின் கர்ப்பக் காலம் 16 மாதங்கள். 2 முதல் 4 குட்டிகளை இது ஈனும்.

கட்டைச்சுறா பவழப்பாறைகளையும் ஆழம்குறைந்த கடல்பகுதிகளிலுமே அதிகம் சுற்றித்திரியும் சுறா. கட்டைச்சுறாவைப் போலவே தூவிகளில் கருந்திட்டு உள்ள மற்றொரு சுறாவும் இருக்கிறது. அது குண்டன் சுறா. சாம்பல் அல்லது கருநீல நிறமான இந்த சுறாவின் பின்புற அடித்தூவியைத் தவிர்த்து மற்ற தூவிகள் அனைத்திலும் கருந்திட்டு காணப்படும். முகம் வட்டமாக சற்று நீண்டுகாணப்படும். இதன் முதுகு முன்புறதூவி அரிவாள் போன்றது. பின்புற முதுகுத்தூவி சிறியது. இரு தூவிகளும் இணைப்பு எதுவுமின்றி தனித்தனியாக காணப்படும். குண்டன் சுறாவின் நிறம் சாம்பல் முதல் பழுப்பு. எளிதாகக் காணக்கூடிய வகையில் இதன் உடலின் இரு பக்கங்களிலும் வெண்வரிகள் தென்படும்.

262 அடி ஆழ கடலில் குண்டன்சுறா காணப்படும். திருக்கை, கணவாய் போன்றவை இதன் முதன்மை உணவுகள். கட்டைச்சுறா போலில்லாமல், குண்டன் சுறா பெரும்பாலும் தனிமை விரும்பி.

இரை உண்ணும் போது இது கண்களை தலைக்குள் உருட்டிக் கொள்ளும். கரையோரம் வந்து மனிதர்களைத் தாக்கும் பழக்கமும் குண்டன் சுறாவுக்கு உண்டு. 
நீங்கள் கடலில் முக்குளிப்பவராக இருந்தால் கட்டைச்சுறாவுக்கும், குண்டன் சுறாவுக்கும் உள்ள வித்தியாசத்தைப் புரிந்து கொள்வது நல்லது. மாறாக குண்டன் சுறாவை கட்டைச்சுறா எனத் தவறான புரிதல் ஏற்பட்டால் அது ஆபத்துக்கு வழிவகுக்கும்.
(குறிப்பு: படத்தில் உள்ள இருசுறாக்களும் கட்டைச்சுறாக்களே)

லோமியா (Notched butterfly threadfin bream)

 

தெளிந்த ரோஸ் மிட்டாய் நிறம் கொண்ட லோமியா மீன் நவரைக்கு உறவுக்கார மீன். பவழப்பாறை களுக்கு அடுத்த பள்ளங்களில் அதாவது பார்விட்டு தாழ்ந்த பகுதிகளில் வாழும் கடலடி மீன் இது. இந்தியப் பெருங்கடல் இதன் இருப்பிடம். குறிப்பாக பாரசீக வளைகுடாவில் இந்தவகை மீன்கள் அதிகம்.

லோமியா மீன் 8 அங்குலம் முதல் 29 சென்டி மீட்டர் வரை நீளமிருக்கும். கடலில் ஆழம் செல்ல செல்ல இந்த வகை மீனின் அளவு பெரிதாக இருக்கும். மீனின் மேற்பகுதி பிங்க் நிறமாகவும், அடிப்பகுதி வெள்ளி நிறமாகவும் மிளிரும். இந்த இருநிறங்களையும் எல்லைப் பிரிப்பது போல மெல்லிய சவ்வுத்தோல் ஒன்று செவுள் முதல் வால் வரை ஓடும். Membrane எனப்படும் அந்த மெல்லியத் தோலை உரித்தெடுத்தால் அதன்அடியில் ஓர் ஈர்க்குக்குச்சியை வைக்கும் அளவுக்கு மெல்லிய பள்ளத்தைக் காணலாம். வெட்டுப்பட்ட (Notched) என்று லோமியா மீனுக்குப் பெயர்வர இந்த பள்ளக் கோடே காரணம்.

லோமியாவின முதுகில் 10 முள்கதிர்தூவிகளும், 9 மென்கதிர்தூவிகளும் காணப்படும். முதுகுத்தூவியின் முனைகள் தோடம்பழ நிறம் எனப்படும் ஆரஞ்சு நிறத்தவை.

வால்அடியில் 9 கதிர்தூவிகள் காணப்படலாம். அடிப்பக்க முன்தூவி கூர்மையானது. வாலடித் தூவியைத் தொட்டுவிடும் அளவுக்கு அது

நீளமானது. லோமியாவின் பக்கத்தூவிகள் நீளமானவை. தூவிகள் அனைத்துமே பிங்க் நிறமானவை. லோமியாவின் வாலின் மேல்நுனி கீழ்நுனியை விட சற்று நீளமானது.

இந்த மீனின் தாடையிலும், விழிகளுக்கு முன்பும் பொன்மஞ்சள் நிற வரிகள் காணப்படும்.

சிறுகூட்டமாகத் திரியும் லோமியா மீன், பகலில் இரைதேடக்கூடியது. முத்துப் படுகைகள் மற்றும் மண்டி பகுதியில் இந்த கடலடி மீன் அதிகம்

காணப்படும்.

17 மீட்டர் முதல் 100 மீட்டர் ஆழத்தில் லோமியா வாழக்கூடியது. Nemipterus peronii என்பது இதன் அறிவியல் பெயர்.

ஓட்டுண்ணிகளுக்கு அதிகம் இடமளிக்கும் லோமியாவில் ஏறத்தாழ 26 வகைகள். அதில், கிளி லோமியா, கிளிப்பச்சை நிற தூவிகள் கொண்டது. ராசியா லோமியா என்பது 8 முதல் 10 கிலோ வரை நிறையுள்ள பெரிய மீன். அழுக்கு சிவப்பு மிட்டாய் வண்ணமாக இது காணப்படும்.

கண்டல், துள்ளுகெண்டை, சங்கரா என்பது லோமியாவுக்கான வேறுசில பெயர்கள் எனக்கருதப்படுகிறன.

கண்ணாடி காரல் (Moon Fish)

மீன்கள் உலகம் வியப்பானதுதான். அந்த மீன்களில் கொஞ்சம் வியப்பான மீன் கண்ணாடி காரல். வடதமிழகத்தில் இதன் பெயர் அம்பட்டன்கத்தி. அறிவியல் பெயர் mena maculate. ஆங்கிலத்தில், நிலாமீன் எனப்பொருள்படும் MOON FISH என இது அழைக்கப்படுகிறது. இதன் மற்றொரு பெயர் ஒபா (OPAH).

கார்ச்சக்கரம் அளவுக்கு வளரக்கூடிய மீன் இது. முழுக்க முழுக்க இந்தமீன் தட்டையான, ஏறத்தாழ வட்டவடிவம் கொண்டது. மீனின் பெரும்பகுதி வெள்ளி நிறமாகவும், மேற்பகுதி பசியநீல நிறமாகவும் பொலியும். மேற்பகுதியில் 3 முதல் 4 கருஞ்சாம்பல் நிற திட்டுகள் காணப்படலாம்.

சிறிய முன்துருத்திய வாயும், கவைபோல பிளந்த வாலும் இதன் முக்கிய அடையாளங்கள்.

இவ்வளவு தட்டையான இந்த மீன், இதயம், மூளை போன்றவற்றை எங்கே வைத்துக் கொள்கிறது என்பது புதிர்.

உலகின் முதல்வெப்ப ரத்த மீனாக கண்ணாடி காரல் அறிவியலாளர்களால் கருதப்படுகிறது. கடலில் எவ்வளவு குளிர்நிறைந்த ஆழத்தில் மூழ்கினாலும் தனது உடலை இது வெதுவெதுப்பாக வைத்துக் கொள்ளும். எவ்வளவு ஆழத்தில் மூழ்கினாலும், இதன் வெப்பநிலை 5 பாகை செல்சியசாகவே இருப்பது அதிசயம்.

சூரை (TUNA) போன்ற மீன்கள் உடலை வெதுவெதுப்பாக கடல்மட்டத்துக்கு அவ்வப்போது வந்து செல்ல வேண்டியிருக்கும். ஆனால், கண்ணாடிகாரல் அப்படி வரத் தேவையில்லை. சிறகு போன்ற பக்கத் தூவிகள் மூலம் நீந்தும் இந்த மீன், 160 அடி முதல் ஆயிரத்து 300 அடி ஆழத்தில் பெரும்பாலும் தங்கியிருக்கும்.

கண்ணாடி காரல் கூட்டமீன் அல்ல. இது தனித்து திரியக்கூடிய அரிய மீன். இந்தியப் பெருங்கடல் போன்ற வெப்பக்கடல்பகுதியே இதன் முதன்மை வாழ் விடம்.

உடல்வெப்பம் காரணமாக கூரிய பார்வை கொண்ட மீன் இது. கடலின் இருள் ஆழங்களிலும் இம்மீன் தெளிவாகப் பார்க்கக் கூடியது. கொன்றுண்ணியான கண்ணாடி காரல், பெருங்கடல்களில் நீண்ட தொலைவு நீந்தவும் கூடியது.

மீனம்பர் (அம்பர் கிரிஸ்) (Ambergris)

ஓமான் நாட்டின் கடலோரம்…

இங்குள்ள சார்கியா, வுஸ்தா, டோஃபார் கடற்கரைகளில் அவ்வப்போது ஓர் அதிசயப் பொருள் கரையொதுங்கும்.

மெழுகு போன்ற ஒரு பொருள் அது. இன்னும் சொல்லப்போனால் உலகின் மிக விலைகூடிய மெழுகு அதுதான்.

அம்பர் கிரிஸ் என்று அதைச் சொல்வார்கள். அண்மையில், ஓமான் நாட்டின் குரயாத் பகுதியில் காலித் அல் சினானி என்பவர் உள்பட 3 மீனவர்கள் இந்த அதிசயப் பொருளைக் கண்டார்கள்.

80 கிலோ எடையில் மிதந்து வந்த அந்தப் பொருள் அம்பர் கிரிஸேதான்.

ஸ்பெர்ம் திமிங்கிலம் எடுத்த வாந்தி அது.

ஆனால், அந்த வாந்தி, வாய்க்கும் வயிற்றுக்கும்பற்றாமல் பிழைப்பு நடத்தி வந்த அந்த 3 ஏழை மீனவர்களையும் ஒரே நொடியில் குபேரர்களாக மாற்றி விட்டது.

ஸ்பெர்ம் திமிங்கிலங்கள் ஆழ்கடலின் அடிப்பகுதியில் முக்குளித்துச் சென்று அங்கே பீலிக் கணவாய்களை வேட்டையாடித் தின்பது வழக்கம்.

கணவாயை விழுங்கும் திமிங்கிலத்தால் கணவாயின் தோட்டை (ஓட்டை) செரிக்க வைக்க முடியாது. திமிங்கிலக் குடலில் சிக்கிக் கொள்ளும் இந்த கணவாய் ஓட்டைச்சுற்றி எண்ணெய் வடிவப் படலம் ஒன்று தோன்றும். அதுதான் அம்பர் கிரிஸ்.

சிப்பியின் வயிற்றில் முத்து கிடைப்பது போல, திமிங்கிலத்தின் வயிற்றில் கிடைக்கும் அரிய பொருள் இந்த அம்பர்கிரிஸ். திமிங்கிலம் சில வேளைகளில் வாந்தி எடுத்து இந்த அம்பர்கிரிஸை வெளியே கக்கும். அல்லது இறந்த ஸ்பெர்ம் திமிங்கிலங்களின் வயிற்றைப் பிளந்தாலும் ஒருவேளை அம்பர்கிரிஸ் கிடைக்கும்.

மஞ்சள் நிற மெழுகு போன்ற இந்த அம்பர்கிரிஸ் ஆரம்பத்தில் துர்நாற்றம் வீசக்கூடியது. வெட்டி உலரவைத்தால் இதில் இருந்து நறுமணம் வீசும்.

நறுமணம் கமழும் இந்த அம்பர்கிரிஸை, வாசனைப் பொருட்களைத் தயாரிக்கும்  நிறுவனங்கள் அதிகவிலை கொடுத்து வாங்கிக் கொள்ளும்.

திமிங்கில வேட்டைக்காரர்களிடம் ஸ்பெர்ம் திமிங்கிலம் சிக்கினால் அதன் வயிற்றில் அம்பர்கிரிஸ் இருக்கிறதா எனத் தேடிப்பார்ப்பார்கள். அம்பர் கிரிஸ் இருந்தால் அது புதையல் கிடைத்தது போல.

அம்பர் கிரிஸ் என்பது பிரெஞ்சு மொழிச்சொல். சாம்பல் நிற அம்பர் என்பது அதற்குப் பொருள்.

பழசான விண்ட்சர் சோப். வெண்ணெய் போன்ற மஞ்சள் சாம்பல் நிறப் பொருள் அம்பர் கிரிஸ். அது ஒரு அவுன்ஸ் எடை தங்க நாணயத்துக்கு சம ம்.

காலித் அல் சினானி உள்பட 3 மீனவர்களுக்கு கிடைத்த 80 கிலோ அம்பர் கிரிஸ், ஒரு மில்லியன் ஓமானி ரியாலுக்கு விலைபோனது. அதாவது ஏறத்தாழ 2,597,099 அமெரிக்க டாலர். இதன்மூலம் ஒரே நாளில் உலகத்தின் உச்சிக்குப் போய் விட்டார்கள் அந்த 3 மீனவர்களும்.

அம்பர்கிரிஸ் மட்டுமல்ல. ஸ்பெர்ம் திமிங்கிலத்திடம் இருந்து அம்பர் என்ற அரியவகை பொருளும் கிடைக்கும்.

அம்பருக்கும், அம்பர்கிரிஸுக்கும் நிறைய வேறுபாடுகள் உள்ளன. அம்பர் கடற்கரைகளிலும், உள்நாட்டில் நிலத்துக்கு அடியில் இருந்தும் கிடைக்கக் கூடிய பொருள். ஆனால், அம்பர் கிரிஸ் கடலில் மட்டுமே கிடைக்கக் கூடியது.

அம்பர் கடினமானது, ஒளிபுகக் கூடியது. வாசனையற்றது. அம்பர்கிரிஸ் மென்மையானது. மெழுகு போன்றது. நல்மணம் வீசக்கூடியது. துருக்கியர்கள் அம்பர்கிரிஸை சமையலுக்குப் பயன்படுத்துவார்கள். மெக்கா செல்லும் திருப்பயணிகள் அம்பர்கிரிஸை உடன் எடுத்துச் செல்வார்கள்.

உலகின் வெப்பக் கடல்களில், குபேரனின் கருவூலத்தில் இருந்து தப்பி மிதக்கும் அரிய பொருள் அம்பர்கிரிஸ்.